Dali e vo red sto se raspusti sobranieto?

Пратениците на македонското Собрание попладнево ја започнаа седницата, со единствена точка самораспуштање што ќе значи предвремени избори.

Собранието утре ќе расправа за распишување на предвремени парламентарни избори. Спикерот Георгиевски ја закажа седницата, откако синоќа извршниот комитет на ВМРО-ДПМНЕ одлучи да ја поддржи иницијативата на ДУИ.

Одлуката ќе стане извршна вечерва, откако за неа позитивно треба да се произнесе последниот партиски филтер, Централниот комитет, кој заседава веќе еден час.

„Во овој момент, во однос на сите најнови развои на настаните и по однос на спорот кој Грција го има со нас и во однос на евроатлантските интеграции и во однос на парламентарната неефикасност и случувањата во Букурешт, нема подобро решение од тоа нацијата да одлучи да оди на предвремени избори, бидејќи со предвремени избори ќе се добие нов мандат, ќе се добие поефикасен парламент и поголем капацитет, да се остваруваат реални резултати и реформи за забрзани евроатлантски интеграции“, изјави Антонио Милошоски.

Од партиски извори дознаваме дека кај потесното раководство немало дилеми дали треба да се оди на избори. Расправата по таа точка на седницата, која почна на полноќ и траеше до три часот изутрина, траела само петнаесетина минути.

Во ВМРО-ДПМНЕ очекуваат расправата да трае најдоцна до петок. Проценуваат дека без проблем ќе се обезбедат 61 глас од пратениците, колку што се потреби за распишување на новите избори.

Тие ќе се организираат според постојниот изборен законик.

Во него се предвидува изборите да се одржат најдоцна 60 дена од распуштањето на Собранието, што значи дека доколку Собранието донесе одлука утре, тие ќе се одржат најдоцна на 10 јуни.

Во споредба со процедурата за редовни избори, ќе се скратат сите рокови освен тие за кампања, таа останува 20 дена.

Спикерот Георгиевски ја закажа собраниската седница за во 11 часот. За во исто време претседателот Црвенковски свика лидерска средба во Клубот на пратениците. Засега нема информации каде ќе појават лидерите.

Опозициската СДСМ утре силно ќе се спротивстави на иницијативата на ДУИ, поддржана од владејачката партија ВМРО-ДПМНЕ, за самораспуштање на Парламентот.

Му порачаа на Груевски, наместо со предвремени избори да бега од одговорност затоа што не ги исполнил ветувањата, НАТО, Европската унија, економија, да го каже владиниот став кои се државните приоритети по Букурешт.

„Јас сум убедена дека граѓаните тоа ќе го казнат. Затоа што тие не сакаат политичари кои бегаат од одговорност. Македонија е исправена пред изборот „или-или“, ги видовте целите кои треба да ги постигнеме до септември 2008 година. Или ќе имаме избори при што ќе се заборават сите приоритети и сите реформи, бидејќи институциите нема да можат да функционираат во полн капацитет, или до септември ќе дадеме максимум за Македонија да го добие датумот за преговори, па и покана за членство во НАТО на крајот на годината“, изјави Радмила Шеќеринска, претседател на СДСМ.

И лидерот на либералите Стојан Андов, вели дека ќе гласа против. Потенцира дека до септември Македонија треба да го реши проблемот со името.

„Сега откако ќе се распушти Парламентот и Владата веќе станува техничка Влада, единствено со полн уставен капацитет делува Претседателот на Републиката. Тој ги има сите овластувања да ја искористи таа позиција, што е сосема во ред, бидејќи мртвилото најлошо е за сите. Да го забрза процесот на решавање на спорот со Грција, можеби и да го реши“, вели Стојан Андов, претседател на ЛП.

ДУИ, пак, денеска повторно ги повика парламентарните партии да ја поддржат нивната иницијатива за предвремени избори.

„Целта е остварување на европската агенда, консолидирање на институциите, зајакнување на меѓуетничките односи, имплементација на охридскиот договор и разрешување на севкупните проблеми. За се ова е потребна заедничка платформа, политички и етнички консензус“, вели во писмената изјава лидерот на ДУИ Али Ахмети.

Помалите и независните се против избори сега, ќе гласаат за избори во септември. Ги повикаа граѓаните да се спротивстават на концептот на ВМРО-ДПМНЕ за иднината на Македонија.

Побараа државата во наредните два месеца да направи се за македонските граѓани да не бидат заложници на шенгенската бариера.

До претседавачот на ЕУ, Јанез Јанша, упатија писмо во кое бараат укинување на визите за македонските граѓани.